2025 жылдың соңында жарық көрген Marty Supreme фильмі «Алтын глобус» сыйлығының үш номинациясында үздік атанып, кейін «Оскар» премиясының тоғыз аталымына ұсынылды. Алайда бұл жетістік тек актерлік ойын немесе режиссурамен шектелмейді. Фильмнің кең аудиторияға жетіп, мәдени феноменге айналуында дәстүрлі жарнамадан саналы түрде бас тартқан креативті маркетинг стратегиясы шешуші рөл атқарды.
Авторлық кинодан кең аудиторияға
Фильмнің режиссері Джош Сэфди бұған дейін інісімен бірге түсірген авторлық бағыттағы жұмыстарымен танылған. Marty Supreme — оның жеке режиссер ретіндегі алғашқы толықметражды дебюты. Жобаға актер Тимоти Шаламэнің қатысуы да маңызды фактор болды. Ол фильмде тек басты рөлді сомдап қана қоймай, продюсер ретінде де еңбек етті. Актердің жобадағы шығармашылық еркіндігі фильмнің стильдік тұтастығын сақтауға мүмкіндік берді.
Рөлге дайындық барысында Тимоти Шаламэ 2018 жылдан бері кәсіби деңгейде үстел теннисімен тұрақты түрде айналысқан. Алайда бұл деректер фильмнің маркетингтік кейс ретіндегі маңызын айқындайтын негізгі элемент емес, тек жобаның жалпы контекстін толықтырады.
Ирониядан басталған маркетинг стратегиясы
Marty Supreme маркетинг кампаниясының басты ерекшелігі — өзін-өзі әжуалауға құрылған ирониялық тон. Кампания 18 минуттық сатиралық Zoom-бейнемен басталды. Видеода Тимоти Шаламэ A24 студиясының командасына әдейі абсурд әрі күлкілі маркетинг идеяларын «ұсынады». Мысалы, пинг-понг шарлары жаңбырдай жауатын жарнамалық акциялар.
Бұл формат дәстүрлі пресс-релиз немесе тизерден өзгеше болып, әлеуметтік желілерде жылдам таралды. Көрермен фильмді емес, алдымен оның айналасындағы ойынды байқап, қызығушылық таныта бастады.
Онлайн әзілден офлайн акцияға дейін
Zoom-видеода айтылған әзіл идеялардың бірі көп ұзамай нақты іске асты. «Marty Supreme» жазуы бар үлкен қызғылт сары дирижабль АҚШ-тың бірнеше қаласының үстінен ұшып өтті. Бұл акция әлеуметтік желілерде қызу талқыланып, фильм атауын кең аудиторияға танытты.
Маркетингтің онлайн және офлайн форматтарының осылайша бір-бірін толықтыруы кампанияның әсерін күшейтті. Фильм жарнамасы экранмен шектелмей, қоғамдық кеңістікке шықты.
Кампания аясында шектеулі тиражбен шығарылған желден қорғайтын күртелер сатылымға шықты. Бұл өнімдер классикалық фильм мерчі ретінде емес, streetwear стиліндегі сәнді киім ретінде ұсынылды. Танымал инфлюенсерлер мен әртістердің бұл киімдерді күнделікті образында киюі брендтің танымалдылығын арттырды.
Осы арқылы фильм атрибутикасы жарнамалық өнімнен гөрі мәдени кодқа айналды.
Перформанс және қатысу тәжірибесі
Онлайн кампания офлайн перформанстармен толықтырылды. «Marty Supreme Invitational» атты үстел теннисі турнирі ұйымдастырылып, қоғамдық кеңістіктерде түрлі акциялар өтті. Нәтижесінде көрермен фильмді тек көріп қана қоймай, оның атмосферасына қатысушы ретінде тартылды.
Бұл тәсіл фильм көрсетілімін пассивті тұтынудан белсенді тәжірибеге айналдырды.
TikTok пен Instagram платформаларында классикалық трейлерлерден бөлек, арнайы вирусқа бағытталған қысқа видеолар жарияланды. Әлеуметтік желілерде Тимоти Шаламэ мен Esdeekid атты рэпер бір адам деген теория кеңінен тарады. Бұл теорияны жоққа шығарудың орнына, маркетинг тобы оны ойын элементіне айналдырды. Нәтижесінде Тимоти Esdeekid-пен бірлесіп клип түсірді.
Бұл шешім трендті бақылауға емес, оны саналы түрде басқаруға бағытталған маркетинг стратегиясын көрсетті.
Marty Supreme маркетинг кейсі киноны жарнамалаудың өзі шығармашылық актке айнала алатынын дәлелдеді. Дәстүрлі жарнамадан бас тарту, ирония мен перформансқа сүйену, онлайн мен офлайнды біріктіру фильмді тек прокаттық өнім емес, мәдени феномен деңгейіне көтерді.
Бұл кейс қазіргі киноиндустрияда маркетингтің рөлі өзгеріп, фильмнің айналасындағы әңгіме оның мазмұны сияқты маңызды бола бастағанын көрсетеді.
Marty Supreme маркетингі ирония мен ойынға негізделген модельді ұсынса, Қазақстандық кинода батыл маркетинг стратегиялары басқа формада көрініс тапты. Солардың бірі — Қуаныш Бейсек режиссерлік еткен «Дәстүр» фильмі. Бұл жобада маркетингтік кампания фильм көтерген әлеуметтік тақырыппен тікелей байланыстырылды.
Фильм қоғамдағы зорлық мәселесін және ескірген дәстүрлердің қазіргі әлеуметтік ортаға сай келмейтінін көрсетуге бағытталған. Сюжет желісінде Диана есімді қызға зорлық әрекеті жасалып, оны дәстүрге сүйене отырып зорлық көрсеткен адамға тұрмысқа беру оқиғасы бейнеленеді. Туындының негізгі идеясы — белгілі бір дәстүрлердің қазіргі қоғамда адам құқығына қайшы келетінін көрсету.
Осы тақырыптық өзектілік фильмнің маркетинг стратегиясының өзегіне айналды. Кампания TikTok платформасында вирустық клиптер жариялаудан басталып, алғашқы тизер шықпай тұрып-ақ түсірілім барысын көрсету арқылы көрермен қызығушылығын оятты. Кейін тизер мен постер жарық көрген соң, танымал блогерлермен коллаборациялар жасалып, әлеуметтік желілерде вирусқа бағытталған видеолар таратылды.
Сонымен қатар «Дәстүрлі подкаст» атты арнайы подкаст сериялары шығарылды. Фильмде жын шығару тақырыбы қозғалғандықтан, подкастқа осы салада тәжірибесі бар адамдар шақырылып, контент фильмнің ішкі әлемімен тығыз байланыстырылды. Бұл тәсіл жарнамалық материалды ақпараттық әрі талқылауға ашық форматқа айналдырды.
Фильм прокатқа шыққаннан кейін маркетинг офлайн форматта жалғасын тапты. Басты актерлер ел ішін аралап, әр қалада көрермендермен кездесулер өткізді. Бұл қадам фильмді тек экрандағы өнім ретінде емес, тікелей диалогқа негізделген мәдени оқиға ретінде ұсынуға мүмкіндік берді.
